ലിംഗരാജ് ആസാദിൻ്റെ മോചനം ആവശ്യപ്പെട്ട് പ്രതിഷേധസത്യാഗ്രഹം നടത്തി

സമാജവാദി ജനപരിഷത്ത് അഖിലേന്ത്യാ പ്രസിഡന്റ് ലിംഗരാജ് ആസാദിന്റെ മോചനം ആവശ്യപ്പെട്ട് 2026 ഓഗസ്‌റ്റ് 9 ന് കോട്ടയം പ്രൈവറ്റ് ബസ് സ്റ്റാന്റിൽ സമാജവാദി ജന പരിഷത്ത് നടത്തിയ പ്രതിഷേധ സത്യാഗ്രഹം പ്രമുഖ സോഷ്യലിസ്റ്റ് നേതാവ് അഡ്വ. ജോഷി ജേക്കബ് യോഗം ഉദ്ഘാടനം ചെയ്യുന്നു

കോട്ടയം, ൨൦൨൬ ഓഗസ്റ്റ് ൯: സിജി മലിമല നിരകളിൽ വേദാന്ത കമ്പനി ബോക്‌സൈറ്റ് ഖനനം നടത്തുന്നനീക്കത്തിനെതിരായി സമരം ചെയ്യുന്ന തദ്ദേശ വാസികൾക്കു നേതൃത്വം നല്കുന്നതിന്റെ പേരിൽ ഒഡീഷ സർക്കാർ ജയിലിലടച്ചിരിക്കുന്ന പ്രമുഖ സോഷ്യലിസ്റ്റ് നേതാവും സമാജവാദി ജനപരിഷത്ത് അഖിലേന്ത്യാ പ്രസിഡന്റുമായ ലിംഗരാജ് ആസാദിനെയും സമര പ്രവർത്തകരെയും മോചിപ്പിക്കണമെന്ന് ആവശ്യപ്പെട്ട് സമാജവാദി ജന പരിഷത്ത് കേരള ഘടകത്തിന്റെ ആഭിമുഖ്യത്തിൽ ക്വിറ്റ് ഇന്ത്യാദിനമായ 2026 ഓഗസ്‌റ്റ് 9 ന് ഉച്ച കഴിഞ്ഞ് തിരുനക്കര കോട്ടയം പ്രൈവറ്റ് ബസ് സ്റ്റാൻ്റിൽ പ്രതിഷേധ സത്യാഗ്രഹം നടത്തി. പ്രമുഖ സോഷ്യലിസ്റ്റ് നേതാവ് അഡ്വ. ജോഷി ജേക്കബ് യോഗം ഉദ്ഘാടനം ചെയ്തു. 

സമാജവാദി ജനപരിഷത്ത് ദേശീയ സെക്രട്ടറി
സുരേഷ് നരിക്കുനിമുഖ്യപ്രഭാഷണം
 നടത്തുന്നു.

സമാജവാദി ജനപരിഷത്ത് ദേശീയ സെക്രട്ടറി സുരേഷ് നരിക്കുനി മുഖ്യപ്രഭാഷണം നടത്തി. കഴിഞ്ഞ മാർച്ച് 25-ന് അറസ്റ്റു ചെയ്ത ലിംഗരാജ് ആസാദിനെ 138 വസങ്ങളായി അന്യായമായി ജയിലിലിട്ടിരിക്കുകയാണെന്ന് അദ്ദേഹം പറഞ്ഞു. സമരനേതാക്കൾക്കെതിരെയെടുത്തിരിക്കുന്ന വ്യാജ കേസുകൾ പിൻവലിയ്ക്കണമെന്നും അവിടെ നടക്കുന്ന പോലീസ് അതിക്രമങ്ങളെപ്പറ്റിയും മനുഷ്യാവകാശ ലംഘനങ്ങളെ കുറിച്ചും അന്വേഷിക്കണമെന്നും അദ്ദേഹം ആവശ്യപ്പെട്ടു.

സംസ്ഥാന വൈസ് പ്രസിഡന്റ് എബി ജോൺ വൻനിലം അദ്ധ്യക്ഷം വഹിച്ചു. സമാജവാദി ജനപരിഷത്ത് സംസ്ഥാന സമിതിയംഗം കെ.എസ്. ചാക്കോ,  കടുത്തുരുത്തി ആസ്ഥാനമായ സമീക്ഷ സാംസ്‌കാരികവേദിയുടെ സെക്രട്ടറി സി. എസ്. ജോർജ് സൈന്ധവ മൊഴി പത്രാധിപർ വി.സി സുനിൽ, സമാജവാദി ജനപരിഷത്ത് സംസ്ഥാന വൈസ് പ്രസിഡന്റ് ജയ്മോൻ തങ്കച്ചൻ സംസ്ഥാന സെക്രട്ടറി അഡ്വ. രാമൻ മാസ്റ്റർ എന്നിവർ അഭിവാദ്യമർപ്പിച്ച് പ്രസംഗിച്ചു. സംസ്ഥാന ജനറൽ സെകട്ടറി ഇ.വി. ജോസഫ് സ്വാഗതവും കോട്ടയം ജില്ലാ സെക്രട്ടറി സജി അബ്രഹം പുകടിയേൽ നന്ദിയും പറഞ്ഞു.

-0-

സോഷ്യലിസ്റ്റ് നേതാവ് ലിംഗരാജ് ആസാദിൻ്റെ ജയിൽ മോചനം ആവശ്യപ്പെട്ട് സമാജവാദി ജന പരിഷത്ത് സത്യാഗ്രഹം നടത്തി

കോട്ടയം, 2026 ഏപ്രിൽ 25: ബോക്‌സൈറ്റ് ഖനന പദ്ധതികൾക്കായി ഒഡീഷയിലെ സിജി മലി വനമേഖലയിലെ ആദിവാസി ജനതയെ നിയമ വിരുദ്ധമായി കുടിയൊഴിപ്പിക്കുന്നതിനെതിരായ ജനാധിപത്യപരവും അഹിംസാധിഷ്ഠിതവുമായ സമരത്തെ നയിച്ചതിന് ഒഡീഷ പോലീസ് അറസ്റ്റു ചെയ്ത സമാജവാദി ജന പരിഷത്ത് ദേശീയ പ്രസിഡൻ്റും പ്രമുഖ സോഷ്യലിസ്റ്റ് നേതാവുമായ ലിംഗരാജ് ആസാദിനെ മോചിപ്പിക്കണമെന്നാവശപ്പെട്ട് സമാജവാദി ജനപരിഷത്ത് കേരള സംസ്ഥാന സമിതിയുടെ ആദിമുഖ്യത്തിൽ കോട്ടയത്ത് ഗാസിപ്രതിമയുടെ സമീപത്ത് സത്യാഗ്രഹം അനുഷ്ഠിച്ചു. 

 റായ്ഗഡ, കാലഹണ്ഡി, ബൊലാംഗീർ ജില്ലകളിലെ ആദിവാസി ഗ്രാമപ്രദേശങ്ങളിലെ കുടിയൊഴിപ്പിക്കലുകൾ വന നിയമത്തെയും പെസ നിയമത്തെയും ലംഘിച്ചാണെന്നു് ചൂണ്ടിക്കാട്ടി നിയമവാഴ്ചയ്ക്കു വേണ്ടി ജനാധിപത്യപരമായി പ്രവർത്തിച്ച സോഷ്യലിസ്റ്റ് നേതാവ്‌ ലിംഗരാജ് ആസാദിനെയും മുൻ നിര ആകനായ സുരേഷ് സംഗ്രാമനെയും ഭാരതീയ ന്യായ സംഹിതയുടെ വിവിധ വകുപ്പുകൾ ചുമത്തി അറസ്റ്റു ചെയ്തത് നിയമ വിരുദ്ധവും ജനാധിപത്യ വിരുദ്ധവുമാണെന്ന് സത്യാഗ്രഹം ഉദ്‌ഘാടനം ചെയ്ത സമാജവാദി ജനപരിഷത്ത് ദേശീയ നിർവാഹക സമിതി അംഗമായ അഡ്വ. ജോഷി ജേക്കബ് പറഞ്ഞു. 

 കഴിഞ്ഞ മാർച്ച് 25 ഉച്ചക്ക് ഭവാനി പട്ടണത്തിലെ വസതിയിൽ നിന്നാണ് ലിംഗരാജ് ആസാദിനെ അറസ്റ്റ് ചെയ്തത്. സംഘടനയുടെ മുൻനിര പ്രവർത്തകനായ സുരേഷ് സംഗ്രാമിനെയും അന്നു തന്നെ അറസ്റ്റ് ചെയ്തു. അനവധി ഗ്രാമവാസികളും ജയിലിലാണ്. 

സിജി മലി ഗ്രാമവാസികൾക്കെതിരെ പോലീസും അവർ കേസിൽ സഹായിക്കുന്ന ലണ്ടനിൽ ലിസ്റ്റ് ചെയ്ത ബഹുരാഷ്ട്ര കമ്പനിയായ വേദാന്ത റിസോഴ്‌സസിൻ്റെ ആളുകളും ഗ്രാമവാസികൾക്കെതിരെ നടത്തുന്ന ക്രൂരമായ അടിച്ചമർത്തലുകൾ അവസാനിപ്പിക്കണമെന്ന് അദ്ദേഹം ആവശ്യപ്പെട്ടു.

 ഏപ്രിൽ 8 ന് ഗ്രാമവാസികൾക്കെതിരെ നടന്ന അതിക്രമങ്ങളെപ്പറ്റി ജൂഡീഷ്യൽ അന്വേഷണത്തിന് ഉത്തരവിടാൻ ഉഡീഷ മുഖ്യമന്ത്രി തയ്യാറാകണമെന്നും അദ്ദേഹം അഭ്യർത്ഥിച്ചു. 

 സമാജവാദി ജനപരിഷത്ത് കേരള സംസ്ഥാന സമിതി പ്രസിഡൻ്റ് പി. ഒ. പീറ്റർ അദ്ധ്യക്ഷനായിരുന്നു. എബി ജോൺ വൻ നിലം, അഡ്വ. ജയ്മോൻ തങ്കച്ചൻ, അഡ്വ. മാത്യു അലക്സാണ്ടർ, കെ. എസ് ചാക്കോ, സജി അബ്രാഹം പുകടിയിൽ, ബീന ഷാജി എന്നിവർ പ്രസംഗിച്ചു.

രക്തസാക്ഷിത്വ ദിനാചരണവും ഉപവാസവും സംഘടിപ്പിച്ചു

 കൂത്താട്ടുകുളത്ത് സമാജവാദി ജനപരിഷത്തിന്റെയും ജയഹിന്ദ് പ്രസ്ഥാനത്തിന്റെയും നേതൃത്വത്തിൽ മഹാത്മാഗാന്ധിയുടെ രക്തസാക്ഷിത്വ ദിനാചരണവും ഉപവാസവും നടന്നു

കൂത്താട്ടുകുളം, ജനുവരി 30:  മഹാത്മാഗാന്ധിയുടെ രക്തസാക്ഷിത്വ ദിനാചരണത്തിന്റെ ഭാഗമായി കൂത്താട്ടുകുളത്ത് സമാജവാദി ജനപരിഷത്തിന്റെയും ജയഹിന്ദ് പ്രസ്ഥാനത്തിന്റെയും ആഭിമുഖ്യത്തിൽ ഉപവാസം സംഘടിപ്പിച്ചു. ഗാന്ധി ചിത്രത്തിൽ പുഷ്പാർച്ചനയും  രാംധുൻ ആലാപനവും ഗാന്ധിജി അനുസ്മരണവും അതിന്റെ ഭാഗമായി നടന്നു.

കൂത്താട്ടുകുളം രക്തസാക്ഷി മണ്ഡപത്തിന് എതിർവശത്ത് വൈഎംസിഎ യുടെ മുൻവശത്ത് രാവിലെ പത്തര മുതൽ നാലുമണി വരെ നടത്തിയ ഉപവാസയോഗം സമാജവാദി ജനപരിഷത്ത് ദേശീയ നിർവാഹക സമിതിയംഗവും മുൻ ദേശീയ പ്രസിഡന്റുമായ അഡ്വ ജോഷി ജേക്കബ് ഉദ്ഘാടനം ചെയ്തു. സംസ്ഥാന പ്രസിഡന്റ് പീറ്റർ അദ്ധ്യക്ഷനായിരുന്നു. 

 സംസ്ഥാന ഉപാദ്ധ്യക്ഷനും ജയ്ഹിന്ദ് പ്രസ്ഥാനത്തിന്റെ അദ്ധ്യക്ഷനുമായ എബി ജോൺ വൻനിലം, സമാജവാദി ജനപരിഷത്ത് സംസ്ഥാന സെക്രട്ടറി അഡ്വ. രാമൻ മാസ്റ്റർ, മുൻ പഞ്ചായത്ത് വൈസ് പ്രസിഡന്റും മുൻ നഗരസഭാ കൗൺസിലറും സിപിഐ നേതാവുമായ ഏ എസ് രാജൻ, മുൻ നഗരസഭാ കൗൺസിലറും മദ്യനിരോധനസമിതി നേതാവുമായ സി.എ തങ്കച്ചൻ, സ്വാമി ഗായത്ര്യം, ജയ്ഹിന്ദ് പ്രസ്ഥാനത്തിന്റെ നേതാക്കൾ   രാജു നടപ്പറമ്പിൽ, റോയി ചുമ്മാർ, ജോൺസൻ ചെന്തട്ടേൽ, ജോളി മോൻ, സോഷ്യലിസ്റ്റ് നേതാക്കൾ കെ.എസ് ചാക്കോ, തമ്പി നാരേകാട്ട്, ജോൺ ജോസഫ് മാളിയേക്കൽ എന്നിവർ പ്രസംഗിച്ചു.

ജനുവരി 30 രക്തസാക്ഷിത്വ ദിനാചരണം.

 ജയ് ഹിന്ദ് പ്രസ്ഥാനത്തിൻ്റെയും സമാജവാദി ജന പരിഷത്തിൻ്റെയും ആഭിമുഖ്യത്തിൽ ഉപവാസം

 കൂത്താട്ടുകുളം രക്തസാക്ഷി മണ്ഡപത്തിന് എതിർവശത്ത് വൈഎംസിഎ വളപ്പിൽ. 

 2026  ജനുവരി 30 ന് രാവിലെ പത്തര മണിയ്ക്ക് 

▫️ബംഗ്ലാദേശിൽ ന്യൂനപക്ഷങ്ങൾക്കെതിരെ ഇസ്ലാമികത്വ വർഗീയവാദികൾ നടത്തുന്ന അക്രമങ്ങൾ തടയുക. 

▫️ഇന്ത്യയിലെ വിവിധ സംസ്ഥാനങ്ങളിൽ നടക്കുന്ന ഹിന്ദുത്വവാദി വർഗീയ ഫാഷിസ്റ്റ് അക്രമങ്ങൾ അവസാനിപ്പിയ്ക്കുക.

▫️ആഗോള മുതലാളിത്ത ചൂഷണ ശക്തികൾക്കു വേണ്ടി  ബോധപൂർവം ജനങ്ങളെ വർഗീയമായി ഭിന്നിപ്പിക്കുന്നതിനെ എതിർക്കുക.

▫️അമേരിക്കയുടെ ആഗോള മുതലാളിത്ത മേൽക്കോയ്മ അസഹനീയമാം വിധം വർദ്ധിക്കുന്നതിനെ ചെറുക്കുക.

▫️ ഗാന്ധിജിയ്ക്കും മറ്റു സ്വാതന്ത്ര്യ സമര ദേശീയ നേതാക്കൾക്കും എതിരെ അഴിച്ചുവിട്ടിരിയ്ക്കുന്ന ദുഷ്പ്രചരണങ്ങളെയും അവഹേളനങ്ങളെയും മറ്റ് ആക്രമണങ്ങളെയും ചെറുക്കുക. 

▫️മഹാത്മാഗാന്ധി ദേശീയ ഗ്രാമീണ തൊഴിലുറപ്പു പദ്ധതി പുനരാരംഭിക്കണമെന്ന് ആവശ്യപ്പെടുക.

▫️രാജ്യത്തിൻ്റെ ഫെഡറലിസം സംരക്ഷിക്കുക

▫️തൊഴിലാളി വിരുദ്ധ തൊഴിൽ നിയമ മാറ്റം പിൻവലിയ്ക്കണമെന്ന് ആവശ്യപ്പെടുക.

▫️ സർവ ധർമ്മ സമഭാവനയും വിശ്വ ശാന്തിയും ഉയർത്തിപ്പിടിക്കുക.

ഇന്ത്യൻ റിപ്പബ്ലിക്ക് 76 വയസ്സ് പൂർത്തിയാക്കി

നാട്ടുരാജ്യങ്ങളെ കൂട്ടിച്ചേർത്ത ശേഷം ഇന്ത്യൻ യൂണിയൻ ജനാധിപത്യ റിപ്പബ്ലിക്കൻ ഭരണഘടനയോടെ 1950 ജനുവരി 26നു് ഇന്ത്യൻ റിപ്പബ്ലിക്ക് എന്നപേരില്‍ പരമാധികാര രാഷ്ട്രമായി.

സ്വതന്ത്ര്യം നേടിയ 1947 മുതൽ 1950 വരെയുള്ള കാലയളവിൽ ബ്രിട്ടന്റെ ജോർജ്ജ് നാലാമൻ പേരിനു് ഇന്ത്യയുടെയും രാജാവായിരുന്നു. ഇന്ത്യൻ യൂണിയന്റെ ഔദ്യോഗിക തലവൻ രാജാവിന്റെ പ്രതിനിധിയായ ഗവർണർ ജനറലായിരുന്നു. ഇന്ത്യൻ സർക്കാരിന്റെ ശുപാർശയിലാണ് ഗവർണർ ജനറലിന്റെ നിയമനം ബ്രിട്ടീഷ് രാജാവ് നടത്തിയിരുന്നത്. 1948-ൽ മൗണ്ട്ബാറ്റൺ പ്രഭുവിന്റെ പിൻഗാമിയായി ഇന്ത്യയുടെ ഗവർണർ ജനറൽ സ്ഥാനം ഏറ്റെടുത്ത സി. രാജഗോപാലാചാരി 1950 ജനുവരി 26വരെ തുടർന്നു.1950 ജനുവരി 26 ന് ഡോ. രാജേന്ദ്രപ്രസാദ് ഇന്ത്യയുടെ ആദ്യത്തെ രാഷ്ട്രപതിയായി.

ഇന്ത്യൻ റിപ്പബ്ലിക്ക് 76 വയസ്സ് പൂർത്തിയാക്കി 77ലേയ്ക്കു കടന്നിരിയ്ക്കുന്നു. ഇന്ത്യൻ മതേതര ജനാധിപത്യ സോഷ്യലിസ്റ്റ് റിപ്പബ്ലിക്ക് നീണാൾ വാഴട്ടെ!